རླུང་གིས་ཁུར་བའི་རྣམ་ཤེས།
བརྩེ་བའི་རླུང་བུ་འདི་ལག་པས་མ་ཟིན་པར་བོར་སོང
སྙིང་གི་གཏམ་རྒྱུད་འདི་གཞན་དུ་མ་སྨྲ་བར་རྙིང་སོང
ཁྱོད་ཀྱིས་ངའི་བར་སྣང་ལ་ལྟོས་ཤིག
སྤྲིན་དཀར་གྱི་དུམ་བུ་ཞིག་བར་དོ་ན་ལང་ལོང་གཡོ་བ་བཞིན
བྱ་ཁྱུང་རྫ་རི་སྨུག་པོའི་ཐོང་ཀ་རུ་དཔྱངས་འདུག
ངའི་ས་གཞི་དང་ ངའི་ནམ་མཁའ
སྐྱོད་ཆོག་པའི་འཕུར་ལམ་བདེ་མོ་དག་གི་ངོས་སུ
སྐར་མ་དང་རྩྭི་ཤིང་ལ་ཁོང་འདར་རྒྱག་གིན་ཁྱོད་ལ་ལྟ
ད་དུང་འུར་ཟིང་གི་རྣམ་པར་འཕྱོ་བའི་དགུ་ཆུ་འདིས་ཀྱང
ཛ་དྲག་གི་སྐད་འབོད་བྱེད་གྱིན ན་ཟུག་དང་སྐྱོ་སྣང་གིས
ལོ་ངོ་དུ་མའི་ཐོབ་ཤོར་ལ་མིག་ཆུ་འདོན་གྱིན་ཡོད
ཁེར་ཚུགས་ཀྱིས་འགྲེངས་པའི་སིལ་སྡོང་གི་ལོ་མ་རེས་ཀྱང
བྱེའུའི་ཚོགས་ཀྱི་ཅ་ཅོ་ལ་རང་སེམས་མ་གཡེངས་པར
ཕྱི་དྲན་གྱི་སྡུག་བསྔལ་ཁོང་དུ་རྔུབ་གྱིན
ད་ལོའི་དགུན་ཟླ་འདི་ལ་ཕྱོགས་སུ་འཕུར་གྱིན་འདུག
ངའི་བརྩེ་བ ངའི་དུངས་པ
ད་ལོ་གཞི་ནས་ཁ་བ་དང་བསྡོངས་ནས་འབབ་མགོ་ཚུགས་བྱུང་
